Novas

Como adianto do que amosarán na feira E3, Activision e Bungie traballaron co director Jon Favreau (responsable das dúas primeiras películas de Iron Man) e o actor Giancarlo Esposito (actualmente na serie Revolution) para crear un novo trailer do prometedor xogo Destiny titulado A lei da selva, no que presentan unha liña de acción e aventuras no universo épico no que vai desenvolverse o prometedor xogo en liña do que se darán máis detalles durante a conferencia de Sony o vindeiro 10 de xuño.

O vigués Enrique Pascual González-Babé, vén de ser nomeado director executivo (CEO) da axencia madrileña de comunicación e relacións públicas Indie PR & Digital, centrada en boa medida en achegar servizos aos sectores das telecomunicacións, alimentación ou novas tecnoloxías. Dende o seu novo cargo, González-Babé liderará de xeito íntegro a área de asesoramento estratéxico e relacións públicas da compañía a nivel nacional, encargándose polo tanto de aplicar novas fórmulas creativas de comunicación ou deseñar os plans de medre e espallamento de Indie PR no mercado global. En opinión do profesional galego, ?o reto consiste en romper os modelos comunicativos tradicionais e integrar nun único concepto comunicativo a parte offline, a de toda a vida, co novo ecosistema de redes sociais e blogs?.

O acceso a financiamento de empresas e proxectos emprendedores relacionados coa Rede será un proceso máis doado a partir de agora, pois a rede universitaria iberoamericana RedEmprendia (presidida polo profesor da USC Senén Barro Ameneiro) vén de asinar un convenio marco con ENISA (Empresa Nacional de Innovación SA) de cara a favorecer a realidade destas achegas. Así, con esta unión quérese acadar un meirande uso do préstamo participativo de ENISA (empresa pública do Ministerio de Industria, Enerxía e Turismo), dito doutro xeito: un instrumento de financiamento a medio camiño entre o préstamo tradicional e o capital risco, entre as empresas científico-investigadoras xurdidas do ámbito universitario.

A empresa galega de consultoría e deseño de enxeñaría dixital para as vendas, Redegal, vén de informar da súa nova achega de cara ao desenvolvemento de comercio electrónico, estamos a falar da tenda online de Naffta by Naxxai, marca de roupa deportiva feminina. Emporiso, a nova web de Nafta perfeccionou os seus contidos, a súa navegación, a visibilidade do mesmo, amais de facer máis doado o acceso de cara aos dispositivos móbiles. A renovada web posta en marcha por Redegal diríxese tamén a contribuír a unha mellora no proceso de compra, xa que a navegación polo site é moito máis sinxela e rápida.

HTC anunciou hoxe un novo móbil de gama media, o HTC Desire 600 dual sim, o primeiro smartphone da compañía nesta categoría en integrar HTC Sense 5, HTC BlinkFeed e HTC BoomSound, prestacións que xa podían verse no HTC One e que agora chegan a este terminal máis modesto, aínda que tampouco falamos dun dispositivo de baixas prestacións, pois o novo smartphone funciona cun procesador Qualcomm Snapdragon S4 de catro núcleos a 1,2 GHz, 1 Gb de RAM e 8 Gb de almacenamento interno.

Xa se albisca, e cada vez máis preto, o congreso Ibercom 2013, un evento que se ben non se centra de xeito exclusivo na natureza das novas tecnoloxías da información e nas redes sociais, si que avalía o impacto mundial dalgunha das súas principais consecuencias, como por exemplo o acontecido nos últimos anos nos países do Norte de África e Oriente Próximo, procesos de apertura democrática esixidos e fortalecidos, en boa maneira, a través das ferramentas e servizos dixitais máis populares. Falamos do que se coñece como Primavera Árabe. O congreso, que se vai celebrar na Facultade de Ciencias da Comunicación de Santiago entre o día 29 e o 31 de maio, centrarase polo tanto en avaliar ?a importancia dos medios para a democracia e os cambios sociais?. Segundo avanza a organización, a cita reunirá a máis de 700 investigadores do eido internacional.

Windows 8 está a ser un motor para a innovación nos equipos informáticos, que poden agora adoptar formatos inéditos e presentar propostas curiosas das que aínda queda por ver se existe unha demanda real, e nesta liña HP vén de presentar o Envy Rove 20, unha especie de tablet de escritorio, con pantalla de 20 polgadas, batería cunha autonomía de ata 4 horas e unha peaña que facilita a súa colocación en distintas posicións (para facer cómodo o seu os como tablet ou como se fose un ordenador todo-en-un).

Finalmente as previsións de Samsung cumpríronse e hoxe anuncian que o seu GALAXY S4 conseguiu superar os 10 millóns de unidades vendidas a menos dun mes do seu lanzamento comercial, estimando o fabricante que o seu novo móbil estrela está a vender a razón de 4 unidades por segundo. Deste xeito o GALAXY S4 converteríase no smartphone que máis rápido vendeu na historia da compañía surcoreana, superando amplamente os 50 días que tardou en chegar aos 10 millóns o GALAXY S III, os 5 meses que tardou o GALAXY S II e os 7 meses do GALAXY S.

O concurso organizado no Facebook por Heredeiros da Crus para regalar entradas para o concerto deste venres en Ordes, deixándoas agochadas en varios puntos das cidades galegas, xa obtivo finalmente os seus gañadores. E ademais, en palabras dos organizadores (Airapro), ?foi todo un éxito?. O certame, como lembraremos, levouse a cabo o martes desta semana, manténdose comunicación cos seareiros a través da dita rede social (e tamén de Twitter), onde se lles ofrecían datos e imaxes para facilitarlles a localización exacta dos sobres con dúas entradas. Os pases, 12 en total, fóronse agochando desde o mediodía até preto da medianoite en Lugo, Ourense, Vigo, Ribeira, Compostela e A Coruña.

O eido informativo na nosa lingua, ligado á Rede, segue a reforzarse este ano con novas temáticas e obxectivos. Entre os responsábeis disto atopamos a xente como os responsábeis da posta en marcha da canle Equipaxe de Man, medio na nosa lingua especializado en viaxes por todo o mundo, cunha óptica do máis interesante (non deixando nada por descubrir, non desprezando países nin lugares fóra das rutas convencionais que impoñen as axencias de viaxes, reivindicando tamén o noso, achegando alternativas ao turismo cego e disfuncional de resorts e complexos de luxo).

A Deputación de Lugo deu a coñecer onte unha nova aplicación móbil de balde para permitir que os veciños da provincia poidan notificar dun xeito rápido e sinxelo calquera incidencia ocorrida en instalacións e vías públicas, tanto de titularidade do propio organismo lugués como dos 67 concellos da provincia.
A nova ferramenta móbil está xa dispoñible na App Store e en Google Play, e tamén facilita a inscrición en actividades e cursos organizados pola institución provincial e consultar as últimas novas da entidade e acceder ás redes sociais nas que está presente.

O Parque Tecnolóxico de Galicia (Tecnópole) presentou esta semana unha interesante iniciativa para a nosa mocidade que xunta e harmoniza dous conceptos sobre o papel contrapostos (aínda que non sempre): formación e lecer. Asemade, habería que engadir un terceiro ingrediente: orixinalidade. E tanto que é así, xa que segundo a dirección do complexo empresarial, os Tecnópole Technological Workshops (T2W), así se fan chamar estas actividades, representan case os primeiros campamentos tecnolóxicos de verán que se celebran na nosa terra.

O Diario Oficial de Galicia recolle hoxe unha resolución (dispoñible en formato PDF) da Dirección Xeral do Centro Informático para a Xestión Tributaria, Económico-Financeira e Contable (CIXTEC) pola que se anuncia a contratación do servizo consistente na análise, deseño, desenvolvemento e implantación de novas funcionalidades e na actualización continua no sistema electrónico de facturación da Xunta de Galicia (SEF) co financiado con cargo ao programa FEDER Galicia 2007-2013 nun 80% e ao Fondo de Compensación Interterritorial (FCI) no 20% restante.

A innovación hai que coidala, darlle acubillo e permitirlle que medre libremente. En contra do que se pode pensar, este é un labor colectivo, non só de investigadores, novos empresarios ou desenvolvedores de tecnoloxías. As administracións, por suposto, deben implicarse ao máximo (co fin de axudarlle á nosa terra a saír da focha produtiva causada, en boa medida, pola falta absoluta de innovación e creatividade empresarial), e tamén a cidadanía. Na liña de difundir o valor disto en tódolos eidos da sociedade galega, AXIGA (Asociación de Xestores de Innovación de Galicia) anunciou esta semana que vai levar a cabo unha cumprida serie de actividades de divulgación e promoción ao longo de 2013, en boa medida ao abeiro da campaña Porque a innovación somos todos.

Hai 2 meses o xogo multi-plataforma Apalabrados da compañía arxentina Etermax estreaba a opción de xogar a formar palabras en galego, posibilidade recibida con moita alegría na nosa comunidade, aínda que cun atranco na xogabilidade provocada polo feito de que certas letras alleas á nosa lingua aparecen no dicionario para a súa incorporación en estranxeirismos como jazz, jeep, yin, yang ou windsurf, polo que no reparto de fichas incluíanse esas letras, dificultando considerablemente a formación de palabras, o que vén de ser corrixido hoxe mesmo.

Ao remate de cada ano podiamos facer un repaso das tendencias na Rede grazas á publicación dun Zeitgeist por parte de Google, pero agora esta listaxe das persoas, lugares e cousas máis buscadas en distintas categorías deixa de ter unha periodicidade anual e preséntase mensualmente nunhas Tendencias de busca que polo momento só presentan os resultados para EE.UU. (o resto de países chegarán en breve) nunhas táboas moi atractivas visualmente que facilita afondar en cada categoría e que amosa tanto os elementos con mellor clasificación como as buscas máis populares (neste caso, no último día).

Durante unha visita ás instalacións da empresa compostelá de telecomunicacións Televés, o director xeral do IGAPE, Javier Aguilera, avaliou as súas posibilidades de cooperación ou alianza tecnolóxica con compañías doutros sectores, que demanden aplicacións electrónicas para mellorar os seus produtos ou servizos para gañar competitividade.
Aguilera trasladou aos directivos de Televés as demandas recibidas a través de varios clústers de empresas galegas, que teñen detectada a necesidade de incorporar ás súas cadeas de produción compoñentes tecnolóxicos de alto valor engadido.

A curiosa fórmula de venda de videoxogos promovida por The Humble Bundle, que permite ao usuario final elixir tanto o prezo que paga polos xogos como o reparto que se fai dos cartos entre os seus desenvolvedores, a caridade e os organizadores desta plataforma, continúa a achegar abraiantes ofertas como a que veñen a integrar na súa serie de ofertas semanais e que permite facerse con Alan Wake: Collector's Edition, lote de 2 xogos valorados de xeito independente en 37,99 euros (31,99 euros de adquirise xuntos) por un prezo libre que parta de só 1 dólar.

Pensando no seu uso nas aulas, Logitech deseñou un novo teclado para iPad, que para evitar o problema de ter que andar sincronizándose con distintos tablets (ou un tablet con distintos teclados) opta por unha solución máis doada: conectarse ao tablet de Apple a través de cable, integrando conector tanto de 30 pins como Lightning. Deste xeito, os estudantes só terían que conectalo ao iPad para poder teclear coa comodidade, facendo o tablet máis axeitado para usos de produtividade.

Esta mañá Vodafone celebrou na Coruña unha xornada para dar a coñecer a profesionais locais algúns dos servizos da compañía de telefonía para a xestión de flotas de dispositivos móbiles, centrándose especialmente en Vodafone Secure Device Manager (VSDM) nunha presentación que correu da man de Beatriz Rey, xefa de produto de solucións na nube de Vodafone.
Con esta exposición de posibilidades quedou claro que o control de flotas de dispositivos móbiles xa non está monopolizada por BlackBerry, e cada vez hai máis e mellores servizos para atender ás necesidades da empresa.

A tenda de aplicacións de Windows Phone viviu hoxe unha xornada moi movida, con varios xogos de Electronic Arts que deixaron de ser exclusivos para terminais de Nokia e con algunhas importantes novidades dentro desta primicia da familia Lumia. Os xogos que agora pasan a estar dispoñibles para todo usuario de Windows Phone por 2,99 euros cada un serían Parking Mania, The Game of Life, SPY Mouse e Trivial Pursuit, mentres que os títulos que en primicia para móbiles Lumia son Real Racing 2 a un prezo de 4,99 euros, Tiger Woods 12 (2,99 euros), NBA JAM (2,99 euros) e Mass Effect: Infiltrator (6,49 euros).

Dende a Deputación de Lugo informan da apertura do prazo (do 21 de maio ao 4 de xuño) para participar de balde no evento de redes sociais InLugo, un congreso que reunirá ao máis salientábel da Internet os días 7 e 8 de xuño. Aqueles que desexen acudir a este encontro poden inscribirse na web do organismo provincial ou na propia da iniciativa InLugo até completar o aforo por orde de entrada das solicitudes.

O Colexio Oficial de Enxeñeiros de Telecomunicación de Galicia (COETG) conmemorou o Día Mundial das Telecomunicacións e a Sociedade da Información (o pasado 17 de maio) con varias iniciativas a ter en conta, algunha das cales xa reflectimos en Código Cero (o manifesto e o número especial de A Nosa Rede, amais do foro celebrado con INEO). Pois ben, houbo aínda máis. De feito, este mércores a entidade profesional galega informounos dunha iniciativa de seu que permitiu que a nosa lingua fose incluída no máis alto nivel de celebración mundial da devandita festividade (que, cómpre relembralo, coincide co Día de Internet e Día das Letras Galegas). Isto conseguiuse a través da incorporación do galego ao póster oficial que lle serviu á Unión Internacional de Telecomunicacións (UIT) para conmemorar a festa das redes. Deste xeito, a nosa lingua compartiu espazo con seis idiomas de gran difusión.

Amais de pola posta en marcha dunha web de formación específica para directivos, o grupo galego Femxa está estes días de actualidade por mor do lanzamento dun videoxogo-simulador encamiñado a evitar situacións laborais de risco no mar. Máis polo miúdo, estamos ante unha aplicación que é quen de emular, con tecnoloxía 3D, o día a día dos traballadores dun buque, centrándose en emprazar ao usuario ante acontecementos posíbeis coma un incendio ou unha caída ao mar. A achega de Femxa (Simulador 3D de vida a bordo para formación en Prevención de Riscos Laborais), reproduce as situacións cotiás dun barco arrastreiro conxelador, para axudar a identificar perigos e actuar da maneira correcta, no caso de que se produzan catástrofes no seu seo.

A entidade pública empresarial Red.es, en colaboración con trece Comunidades e Cidades Autónomas (entre as que se conta a nosa), investirá 5,1 millóns de euros no fornecemento de solucións tecnolóxicas para que hoteis e aloxamentos de turismo rural ?poidan optimizar a súa produtividade e mellorar a comercialización da súa oferta?. Este volume de axudas, anunciadas onte en Granada, beneficiarían, segundo informou o Goberno, a máis de 800 empresas.

Entre os días 16 e 19 de xullo desenvolverase na Escola Técnica Superior de Enxeñaría (ETSE) o curso de verán Big Data & Data Science, organizado polo CiTIUS e dirixido polos profesores da Universidade de Santiago de Compostela adscritos ao devandito centro Tomás Fernández Pena e José Ramón Ríos Viqueira. A actividade formativa, informa o centro CiTIUS da USC, artéllase nunha serie de conferencias, mesas redondas e obradoiros para abordar o presente e o futuro dos sistemas e estruturas destinados a acubillar inxentes cantidades de información científica.

Non só hai novas tecnoloxías da comunicación para mellorar a comunicación entre persoas. Hainas que melloran a conexión entre as persoas e os seus vehículos, facilitando a localización destes e, tamén, impedindo o seu extravío ou a revenda a través de mans alleas. Nesta liña insírese a tecnoloxía gañadora do novo Premio á Mellor Idea da revista Actualidade Económica na categoría de Motor (a listaxe en pdf), unha aplicación, de nome Detector OnBike, que contribúe non só a frear a vaga de roubos de motos e outros vehículos semellantes (bicicletas eléctricas, bicicletas convencionais) senón tamén, segundo indican os responsábeis do se desenvolvemento, a ?salvar as vidas dos condutores?.

A compañía chinesa Huawei, unha das maiores fabricantes de equipos de telecomunicacións do mundo, presentou este martes 21 de maio en Santiago de Compostela, da man do seu socio tecnolóxico Coremain, o seu escenario móbil para dar a coñecer a súa visión conxunta sobre o noso xeito de traballar (tecnoloxicamente) o día de mañá. Tal e como avanzamos en Código Cero, tratouse dunha oficina itinerante acubillada nun camión colector de grandes dimensións, aberto ao público durante toda a xornada ao carón do Pazo de Congresos e Exposicións, en San Lázaro. O seu interior, en palabras de Coremain, ?simulaba unha gran oficina intelixente coas últimas novidades en aplicacións e dispositivos, que farán posible o posto de traballo do futuro?.

Para quen ande á procura de canles para obter financiamento de cara á empresa de seu, dicirlle que este xoves 23 de maio, o Centro Demostrador TIC acolle unha sesión informativa sobre as axudas estatais a proxectos innovadores no sector tecnolóxico-dixital. A cita, na que se fará fincapé nos incentivos actuais do Ministerio de Industria, contará coa presenza da subdirectora xeral de Fomento da Sociedade da Información do Ministerio, Mª Ángeles Barragán Zorrilla, e a directora da área de Sociedade Dixital da Axencia para a Modernización Tecnolóxica de Galicia (AMTEGA), Yolanda García. Ámbalas dúas explicarán os requirimentos das axudas aos empresarios do sector tecnolóxico e doutros sectores produtivos así como a representantes de cámaras de comercio, colexios profesionais, asociacións empresariais e de autónomos.

O Grupo Femxa informa dende a súa sede de Vigo dunha nova iniciativa web para facilitar a formación e a achega de habilidades aos nosos directivos, fornecéndoos en liña dos coñecementos específicos que precisan. O portal en cuestión, visiondirectiva.apd.es, é froito dun acordo de colaboración formalizado entre Femxa e a Asociación para o Progreso da Dirección (APD), un acordo que xurdiu co de que os empresarios e altos cargos de todo o Estado poidan conseguir de maneira rápida e cómoda as capacidades que demandan para acadar o éxito nos seus negocios. Baséase polo tanto en algo tan simple e á vez fundamental como achegar formación especializada.

A Asociación de Alumnos da Escola de Negocios da Fundación Novacaixagalicia presentou esta semana, na súa sede de Vigo a publicación De Twitter al cielo, un libro que, como o seu nome indica, diríxese a a pór de relevo as múltiples posibilidades da redes social no camiño da promoción e a comunicación, persoal ou empresarial, unha iniciativa ou dun produto concreto. Ou sexa, as múltiples posibilidades de acadarmos a excelencia a través de Twitter. Na presentación, que veu acompañada dun obradoiro a cargo do co-autor da obra Óscar del Santo (un obradoiro para pór en práctica os consellos recollidos na publicación), fíxose fincapé nunha vantaxe incontestábel: que Twitter ten un auditorio, e non precisamente pequeno. De feito, só en España, hai máis de cinco millóns de persoas tirándolle partido. Por certo que hoxe preséntase tamén na Coruña.

O vindeiro 2 de xuño Bueu acollerá a segunda edición do Festival Social Media de Galicia coñecido como MexilOnseTuits, que ten como eixe principal unha entrega de premios en distintas categorías ás que concorreron numerosos proxectos (máis dun cento) que serven de testemuño do activo que está o sector das redes sociais e a Internet na nosa comunidade. Unha vez avaliadas as propostas por parte dun xurado profesional e da organización do Festival están en disposición de dar a coñecer os finalistas das distintas categorías, de xeito que haberá que agardar á celebración desta festa sectorial no Morrazo dentro de menos de dúas semanas.

Tras un período en probas de tres meses o navegador web Opera estrea versión final para móbiles Android, procurando achegar un acceso aos contidos da Internet dun xeito máis doado e veloz que outros navegadores. Esta aplicación está dispoñible de balde en Google Play, goza dunha interface redeseñada cunhas cores máis luminosas e buscando un uso máis intuitivo e presume dunha funcionalidade de descubrimento de contidos, pois cun simple xesto facilita o acceso a novas de interese das categorías que o usuario decida.

Esta tarde Microsoft celebrou o seu evento #XboxReveal, co que buscaban dar a coñecer a nova xeración da súa consola de videoxogos, que finalmente non responderá a nomes rumoreados como Xbox 720 ou Xbox Infinity, senón que coñecerase simplemente como Xbox One, propóndose non só como un dispositivo para xogar, senón tamén como un centro de lecer electrónico, avanzando na mesma dirección na que tan bos resultados deu a Xbox 360.
A nova consola chegará ao mercado finais de ano, polo que durante os vindeiros meses iremos coñecendo moitos máis detalles da nova plataforma de Microsoft, comezando pola feira E3 que terá lugar o mes que vén.

Esta semana a pontevedresa Smiling Goblin e a coruñesa Gato Salvaje, compañías dedicadas á elaboración de videoxogos, asinaron un acordo de colaboración que abre as portas do vindeiro videoxogo da saga Krynea, unha aventura gráfica que xurdirá froito da colaboración de ambas casas e pretende ver a luz en 2014.
As compañías galegas buscarán cadrar as súas axendas de desenvolvemento a finais de ano, procurando dar un pulo ao sector dos videoxogos clásicos, aumentando a súa competitividade fronte a grandes produtoras internacionais.

A Xunta e máis de 200 axentes do Sistema Galego de Innovación están a consensuar os obxectivos da innovación galega ata 2020, unha estratexia da que depende a captación de ata 1.200 millóns de euros de fondos FEDER da Unión Europea entre 2014 e 2020. O Conselleiro de Economía e Industria, Francisco Conde, presentou hoxe os primeiros resultados desa colaboración, un traballo que servirá para elaborar a Estratexia de Especialización Intelixente de Galicia (RIS3), que debe presentarse este verán ante a Unión Europea.

A aplicación de HERE Maps actualízase para incorporar LiveSight, unha tecnoloxía anunciada xa na presentación de HERE o ano pasado, e que suporía a aplicación da realidade aumentada aos mapas de Nokia cunha precisión que nalgunhas cidades supera a todo o que vimos antes por proxectar a capa gráfica sobre a realidade partindo dun modelo tridimensional da rúa pola que nos estamos a mover.

Os Heredeiros da Crus volven á vida, e fano botando man dunha serie de cousas tecnolóxicas a ter en conta. De feito, os integrantes do xa mítico grupo de Ribeira queren seguir estando onde están os seareiros do rock galego, cantado en galego, por moito que estes seareiros tamén estean agora, co paso do tempo, afianzados firmemente nas redes sociais. Deste diálogo xorde precisamente o concurso convocado polos Heredeiros no seu Facebook con tres obxectivos fundamentais: promover o novo traballo do grupo, convidar aos seus seguidores a xogar e interactuar con eles a través da dita rede social e, tamén, agasallar entradas de balde por toda a xeografía galega.

No vieiro de promover a nova obra de Xosé Carlos Caneiro, A máscara de Ulises, a Editorial Galaxia habilitou na web de seu a posibilidade de descargarmos un dos seus relatos, máis polo miúdo A última memoria de Oliverio Twist. Segundo informa o selo galego, os internautas poderán facerse con este relato en liña, totalmente de balde, dende o apartado específico do O libro do mes. O conto, engade Galaxia, serve de mostra da nova obra Caneiro, que escolma por vez primeira algúns dos seus máis salientábeis traballos breves.

O foro convocado este luns en Santiago por INEO, CENTAC e o COETG serviu entre outras cousas para complementar e visualizar un acordo estratéxico, de gran importancia, para o desenvolvemento futuro das Cidades Intelixentes, concretamente para a súa materialización como cidades accesíbeis tecnoloxicamente (doutro xeito, non serían intelixentes) nas que ninguén fique fóra das vantaxes e potencialidades da Sociedade do Coñecemento. Segundo informa a asociación INEO e segundo avanzamos onte en Código Cero trala celebración do foro, minutos antes deste evento tivo lugar no CNTG de Santiago a formalización dun convenio entre a dita asociación galega e máis o Centro Nacional de Tecnoloxía da Accesibilidade (CENTAC).

A empresa galega 2Mares informa que estará estes días na nova edición (a novena) dun dos principais escaparates estatais de novas tecnoloxías, metodoloxías e modelos de comunicación e atención co cliente empresarial: o Salón Expocontact´13, que se celebra os días 22 e 23 de maio en Madrid. Ao seu acubillo, 2Mares participará co relatorio Tres sorpresas ao analizar as conversas de extremo a extremo, a cargo de Enrique de Miguel iLarri, responsábel da empresa galega. Asemade, tamén ten previsto participar na mesa redonda Redes sociais e ferramentas 2.0 na xestión para o cliente do futuro, xunto a outros profesionais da innovación ao servizo da xestión dos clientes nas diferentes comunidades e servizos de Internet.

O mes que vén chega ao mercado o scanner portátil IRIScan Book 3 en dous modelos, un básico (por 99 euros) e outro Executive (por 129 euros), destacando este último por contar con conectividade Wi-Fi, o que facilita tanto a subida dos documentos dixitalizados á nube (a servizos como Dropbox, Evernote, Google Drive...) con só premer un botón como transferir documentos a outros dispositivos cos que se comunica sen fíos e incluso empregarse dende dispositivos móbiles a través dunha aplicación de balde dispoñible para Android e para iOS, facilitando así o levar os nosos documentos escaneados a calquera parte.

España segue a ostentar a dubidosa honra de estar entre os países que máis merda acubillan e mandan por correo electrónico, co agravante de que este lixo non é só lixo que poidas coller e botar á papeleira, non, do que se trata é de tentar, unha vez tras outra, que os internautas abran a súa carteira logo de ensarillalos con todo tipo de calotes en liña, decote de tipo bancario (phishing). En definitiva, que o país continúa a ocupar a cabeza dos máis phishers do mundo (a día de hoxe no posto 12), e xa son moitos anos ocupando os primeiros chanzos desta listaxe (en Código Cero xa o levamos reflectindo dende 2006). Así o reflicte o último informe de correo lixo en 2013 de Kaspersky Lab.

A Comisión do Mercado da Telecomunicacións (CMT) publicou hoxe a súa nota mensual relativa ao mes de marzo (dispoñible en formato PDF), na que fan balance do sector das telecomunicacións en España, continuando a rexistrar unha forte caída no número de liñas móbiles (312.675) provocada principalmente polo descenso de liñas de prepagamento e correspondendo principalmente a Movistar e Vodafone (mentres que os Operadores Móbiles Virtuais continúan a gañar peso).

A Consellería de Economía, a través do IGAPE, vai organizar o vindeiro 28 de maio unha xornada que colle de preto a calquera dos nosos profesionais que teña proxectado, a curto ou medio prazo, pór en marcha unha iniciativa tecnolóxico-dixital de mercado. Falamos da nova edición do Día do Emprendedor de Galicia, unha iniciativa de tipo xenérico que, porén, inclúe no seu programa certos recursos e achegas de asesoramento para materializar proxectos tecnolóxicos. De feito, no programa interveñen a axencia AMTEGA, Blusens ou WeKAb (responsábel do portal de servizos para a formación WeKCo). A nivel xeral, o obxectivo da xornada é subministrar a emprendedores e novos empresarios habilidades e recursos para afianzárense no mercado.

A cadea de tendas de electrónica de consumo, Worten, con presenza en Vigo e A Coruña, estrea un servizo de liberación de móbil por IMEI, de xeito que practicamente calquera terminal adquirido a través dun operador español pode desligarse da súa compañía mediante un código de desbloqueo que non afecta á súa garantía nin ao seu funcionamento, aínda que a recepción de tal código pode levar dende uns poucos minutos ata un par de días segundo o caso.

encargouse de dar a coñecer os cambios en Flickr" title="Marissa Mayer encargouse de dar a coñecer os cambios en Flickr" style='max-width:100%; padding:4px;display: block; margin-right: auto; margin-left: auto;clear:both;' />
Aínda que a compra de Tumblr por parte de Yahoo! fose unha das novas da xornada de onte, a compañía dirixida por Marissa Mayer non quixo desaproveitar a ocasión de ter os focos sobre a mesma para dar organizar un evento para os medios de comunicación en New York no que sorprender anunciando a renovación do seu servizo de imaxes, que levaba varios anos perdendo pulo. O servizo de Flickr non só muda a súa aparencia facéndoa moito máis visual (maximizando o espazo que ocupan as imaxes), senón que tamén muda de modelo de negocio drasticamente, ofrecendo 1 Tb de almacenamento para fotografías totalmente de balde (permitindo a posibilidade de pagar para evitar a publicidade no servizo ou para contar cun almacenamento aínda maior).

Telefónica Dixital vén de ser recoñecida (pdf) como un dos líderes mundiais na Provisión de Servizos de Comunicación (CSP polas súas siglas en inglés), M2M, por dúas firmas de analistas da industria. Analysys Mason, no seu 2013 M2M Scorecard, empraza a Telefónica na escolma de iconas do sector mundial especializadas no dita tecnoloxía. Doutra banda, no seu estudo comparativo anual, Machina Research salienta que ?Telefónica é a empresa que máis fixo durante os últimos 12 meses para reforzar a súa posición en M2M?.

A compañía santiaguesa Coremain e o seu socio tecnolóxico Huawei veñen de desprazar a Compostela unha sede conxunta transportábel co obxectivo de dar a coñecer os froitos e posibilidades do seu traballo recente, achegando o resultado da suma de cadansúa experiencia no ámbito TIC. En realidade, trátase dunha Oficina Móbil Intelixente, equipada para dar conta polo miúdo das últimas novidades en aplicacións e dispositivos que, en palabras de Coremain e a chinesa Huawei, ?farán posible o posto de traballo do futuro?.