• Mulleres profesionais das nosas empresas achegaron a súa experiencia profesional, convidando o alumnado a reflexionar sobre a fenda de xénero no ámbito das TIC

Dende o Clúster TIC Galicia vimos de concluír o ciclo de relatorios que organizamos desde abril en trece centros educativos galegos, no marco do programa "Que non te líen, ti elixes", co obxectivo de derrubar estereotipos de xénero entre o alumnado de 3º e 4º da ESO á hora de escoller a súa vocación profesional, poñendo o foco naqueles ciclos con menor presenza feminina.

A través desta iniciativa, promovida pola Consellería de Educación, Ciencia, Universidades e Formación Profesional e a Consellería de Emprego, Comercio e Emigración da Xunta, distintas profesionais de empresas socias da entidade ofreceron charlas didácticas para convidar á reflexión e xerar debates relacionados coa fenda de xénero no ámbito das TIC. 

Desde aquí queremos agradecer a todas as mulleres referentes, profesionais das nosas empresas socias, que participaron na iniciativa, achegando a súa experiencia persoal e profesional para incentivar o talento libre de prexuízos:

• Jessica Penela, senior developer .NET Core & React en Aldaba.
• Rosa Vázquez, co-founder & CFO en Codee.
• Aida Pena, jefa de equipo en Bahía Software, Lucía Martínez, backend developer, e Raquel Fuentes, project manager en Cinfo.
• María Xosé Saborido, coordinadora do Departamento de Soporte Técnico de Dinahosting.
• Lluvia Montero, técnica de Recursos Humanos en Femxa.
• Alba Meijide, AI project manager en Ilux Visual Techonologies.
• Cristina Nogueira, xeneralista de Recursos Humanos en Inforhouse.
• Yudani Riobó, head of Innovation en Quobis.
• Natalia García, senior B2B presales & implementation specialist en R.
• Olalla, Rodríguez, da área de Desenvolvemento de Negocio de Sixtema.
• Tamara Cutrín, responsable de Persoas e Cultura en Teimas.

Esta é a cuarta convocatoria na que participamos, poñendo en valor o papel destas mulleres de éxito profesional como fonte de inspiración para estimular o espírito crítico na identificación de estereotipos sexistas asociados a determinadas profesións masculinizadas, contrastar as condicións laborais en diferentes ámbitos e sectores profesionais ou poñer en común datos sobre a representación feminina nos ciclos de FP e profesións masculinizadas.