O Clúster TIC Galicia organizou hoxe na Cidade das TIC a primeira sesión pitching do programa Tech Angels ante as empresas socias interesadas en coñecer de primeira man os proxectos seleccionados para participar na convocatoria, posta en marcha o pasado mes de marzo coa colaboración do Igape. 

A xornada reuniu a seis emprendedores e startups, así como a empresas tractoras do ecosistema tecnolóxico galego -Aldaba, Cuatro Digital, cinfo, Dimensiona, Dos Espacios, Green Skills, Imatia, Ipglobal, Itelsis, Merlin Software, Ozona, Quobis, Sg Tech- co obxectivo de promover alianzas estratéxicas entre ambas partes para impulsar o desenvolvemento das solucións presentadas.

Propostas innovadoras

Os promotores destes proxectos tiveron a oportunidade de explicar o seu modelo de negocio, o seu estado de madurez e as súas necesidades inmediatas e a longo prazo:

• Earlify Health: ecosistema dixital de saúde pediátrica que emprega intelixencia artificial para a detección temperá de trastornos do neurodesenvolvemento e a rehabilitación personalizada no fogar.
• ProcessNoise: solución que integra Lean Six Sigma e IA para detectar ineficiencias en procesos empresariais e optimizar a toma de decisións.
• Deservicio: marketplace dixital que conecta usuarios con profesionais de servizos de mantemento e reformas, facilitando a contratación de forma rápida e segura.
• Pulsar: plataforma SaaS baseada en IA e datos biométricos para a predición de rendemento deportivo e detección de talento, actualmente centrada no piragüismo.
• Qinetiqs: solución avanzada para a xestión de emerxencias climáticas que combina simulación, xemelgos dixitais e intelixencia artificial para anticipar riscos, como incendios ou incendios forestais.
• Skin Mask Pro: plataforma para o coidado da pel que combina un dispositivo facial intelixente con software de análise para ofrecer tratamentos personalizados baseados nos propios parámetros da pel.

No caso de producirse un match entre algunha destas ideas e os Tech Angels, as persoas emprendedoras poderán acceder a tecnoloxías complexas, como a intelixencia artificial, así como ao coñecemento e acompañamento estratéxico das compañías consolidadas, un apoio clave para avanzar no desenvolvemento das súas solucións, escalar os seus modelos de negocio e facilitar a súa chegada ao mercado con maiores garantías de éxito.

O programa Tech Angels, que continúa aberto, consolídase así como unha ferramenta estratéxica para fortalecer o tecido emprendedor galego, promovendo a cooperación entre empresas e facilitando a transferencia de coñecemento e tecnoloxía nun ecosistema en constante evolución.