O Clúster TIC Galicia, en colaboración coa European Business Factory (EBF), organiza a xornada Como liderar e comunicar no mundo tech en 2026 o martes 27 de xaneiro, de 10:00 a 12:00 h, no Centro de Servizos Avanzados (CSA) da Cidade das TIC (A Coruña). Trátase dun encontro dirixido exclusivamente a socios da entidade que buscan reforzar as súas competencias de liderado nun momento clave como é o inicio de ano.

O comezo dun novo exercicio adoita vir acompañado pola definición de obxectivos, un reto cada vez maior dado o contexto actual no que vivimos, en constante cambio e marcado por factores como a intelixencia artificial, a transformación constante dos equipos e unha crecente presión polos resultados. Neste escenario cambiante, unha comunicación eficaz convértese nun dos piares fundamentais do liderado tecnolóxico e nunha ferramenta clave para aliñar persoas, equipos e estratexia.

Esta xornada está deseñada para ofrecer unha visión práctica e experiencial sobre como mellorar a calidade das conversas nos equipos tech, poñendo o foco nunha habilidade esencial: a escoita. Entre outras cuestións, analizaranse as diferenzas entre a escoita tradicional e a utilizada nos procesos de coaching, amosando como este cambio pode ter un impacto significativo na comunicación e no liderado. A convocatoria completarase cunha dinámica práctica de “conversación con coaching”, que permitirá ás persoas asistentes traballar con esta ferramenta.

Que se abordará?

A avogada, mediadora e coach internacional Marcela Parga, fundadora de Parga Asociados, será a encargada de dirixir a sesión do 27 de xaneiro, na que se tratarán os seguintes temas:

• Como mellorar os diálogos clave de inicio de ano: obxectivos, foco e compromiso.
• O reto de liderar equipos tecnolóxicos nun escenario de transformación continua.
• Diferenzas entre a escoita habitual e a escoita propia do coaching.
• Comunicación e motivación de equipos en contextos de incerteza.
• Conversas difíciles: rendemento, prioridades e responsabilidade.
• O impacto da calidade das conversacións nos resultados e no clima dos equipos.

Sobre a relatora

Marcela Parga conta cunha ampla traxectoria en liderado e desenvolvemento organizacional. É trainer para España da International Coaching Community e Coach Executivo certificada. Combina a súa experiencia xurídica co acompañamento a persoas e equipos en procesos de cambio. Docente e conferenciante, é experta en conciliación, intelixencia emocional e resolución de conflitos, ademais de coautora do libro “Coaching de equipos”.

A inscrición é gratuíta, e realizarase por orde de solicitude, até completar aforo. As persoas interesadas poden rexistrarse aquí.