Cinfo e Quobis, empresas asociadas do Clúster TIC Galicia, amosarán o potencial tecnolóxico galego na MWC Barcelona. Ambas figuran entre as 49 pemes tecnolóxicas españolas seleccionadas por Red.es para participar no Pavillón de España no maior evento a nivel mundial de conectividade e tecnoloxía móbil, que se celebrará do 2 ao 5 de marzo na cidade condal. 

Nesta edición, o Pavillón de España reorganízase como un espazo dinámico onde as empresas expositoras dispoñen de stands personalizados, como Cinfo e Quobis, que estarán situadas no Hall 4 Stand 4C30, zonas de networking, salas de reunións e un completo programa de conferencias e actividades comerciais.

Innovación audiovisual e intelixencia artificial

No marco deste evento, Cinfo presentará varias das súas tecnoloxías máis destacadas no ámbito audiovisual e de intelixencia artificial:

• Produción automática avanzada: con casos de éxito como tiivii.tv, plataforma que xa emite contidos das principais ligas deportivas de Galicia e que se está expandindo a outras televisións autonómicas e operadores.
• Sistema de VAR sincronizado con 9 cámaras: unha solución que permite aos árbitros facer zoom, avanzar e retroceder frame a frame, así como marcar as xogadas para revisar, xa en uso coa Federación de Patinaxe e presente en competicións como a Copa do Rey de hóckey patíns.
• Realización de interiores: un sistema para salas de música que captura e sincroniza múltiples cámaras do propio espazo, emitindo imaxes cunha latencia mínima para mellorar a experiencia das persoas que está a ver a pantalla, de forma que poidan escoitar o son do directo totalmente sincronizado coa imaxe do concerto.
• Multicámara interactiva: tecnoloxía que recibe os sinais de tantas cámaras como se queira, convérteas nun mosaico e permite o cambio con mínima latencia entre elas, o que posibilita ao espectador elixir a cámara que quere ver en cada momento. Este sistema xa se está aplicando nas cámaras web do tempo da corporación de servizos audiovisuais de Galicia (CSAG), que integra os medios de comunicación públicos galegos.
• Plataforma de axentes de IA: unha infraestrutura que busca democratizar a IA mediante o despregamento de axentes intelixentes personalizables que realicen tarefas de negocio ou procesos empresariais. O obxectivo é que as compañías poidan acceder, configurar os seus datos e que a plataforma lle entregue un axente listo para utilizalo.

Comunicación empresarial e transformación dixital

Quobis, pola súa banda, dará a coñecer na MWC Barcelona as súas “Trusted communications”, a estratexia multicapa coa que a compañía busca construír un ecosistema de comunicacións seguro e confiable.

Esta estratexia engloba os  seus servizos e tecnoloxías de branded calling e loita contra a fraude telefónica, avaliación de risco de chamadas, auditorías de seguridade de redes de telecomunicacións, desenvolvemento de elementos de rede e clientes de UC de clase operador baseados en software libre, que son un recurso esencial para unha soberanía tecnolóxica real, tanto a nivel empresarial como de defensa nacional.

A presenza de Quobis e Cinfo no Pavillón de España reforza a visibilidade do ecosistema tecnolóxico galego, ademais de ofrecer unha excelente oportunidade para establecer posibles alianzas ou expandirse a novos mercados. Neste sentido, na pasada edición da MWC Barcelona, o conxunto de empresas expositoras estimou que a súa participación neste espazo permitiría xerar un volume de negocio de 26,5 millóns de euros. 

No caso de Cinfo e Quobis, non é a primeira vez que resultan seleccionadas para formar parte do Pavillón de España, que só o ano pasado recibiu máis de 13.000 visitantes presenciais e máis de 5.000 virtuais. Acolleu, ademais, 70 actividades no set de conferencias, con relatores de diferentes sectores, mesas redondas e reunións de networking, así como 60 entrevistas no set de podcast do Pavillón.